वीरगन्जका कोरोना संक्रमित पत्रकार यसो भन्छन्

 

पर्साको वीरगन्जमा दुई जना पत्रकारमा कोरोनाभाइरस संक्रमण देखिएको छ।

मंगलबार दुई पत्रकारसहित ३९ जनामा कोरोनाभाइरस पुष्टि भएको सार्वजनिक भएको हो।

आफूले तीन दिनअघि स्वाब परीक्षणका लागि दिएको र आज आएको नतिजाअनुसार पोजेटिभ देखिएको संक्रमित एक पत्रकारले सेतोपाटीलाई बताए।

‘कसरी कोरोना लाग्यो पत्तै पाइएन,’ उनले सेतोपाटीसँग भने, ‘यसअघि संक्रमण देखिएका बस्तीमा रिपोर्टिङमा पनि गएको थिइनँ।’

आफूमा कुनै पनि लक्षण नदेखिए पनि स्वाब परीक्षण गराएको उनले बताए।

‘कोरोना देखियो भन्ने आएपछि म अचम्ममा छु। अहिले अफिसमा काम गरिरहेको छु,’ उनले भने, ‘अब आइसोलेसनमा जानुपर्ला।’

आज साँझ नारायणी उपक्षेत्रीय अस्पतालको आइसोलेसन जाने उनले बताए।

‘कोरोना नेगेटिभ नदेखिएसम्म आइसोलेसनमै बस्नुपर्छ,’ उनले भने, ‘तर लक्षण केही दिएको छैन।’

कोरोना पोजेटिभ देखिएकाहरूमा स्वास फेर्न गाह्रो हुने, शरीर दुख्ने, खोकी लाग्नेजस्ता लक्षण देखिने गरेका छन्।

ती पत्रकारका अनुसार पर्साका अर्का पत्रकारमा पनि कुनै लक्षण देखिएको छैन।

‘ऊ पनि मजस्तै काम गरिरहेको छ। कुनै लक्षण थिएन,’ उनले भने, ‘हामीलाई कसरी कोरोना देखियो छक्क छु।’

उनका अनुसार वीरगन्जका अरू पत्रकारहरू पनि स्वाब परीक्षणका लागि पठाइएको छ। उनीहरूको नतिजा आउन बाँकी छ।

प्रकाशित भएको : May 12th, 2020

प्रतिकृया दिनुहोस्

सम्वन्धित समाचारहरु