सलह किरा एक केजीको २० रुपैयाँ, एक रातमा ३५ हजार मानिसको खाना बराबर बालीनाली नोक्सान गर्न सक्छ

 

प्रदेश ५ सरकारले सलह किरा समातेर ल्याउनेलाई नगद दिने निर्णय गरेको छ । प्रदेश ५ मा शनिबार सलह किरा देखिएपछि प्रदेश सरकारले एक किलो सलह किरा ल्याए २० रुपैयाँ दिने निर्णय गरेको हो ।

‘सलह किराले पुर्‍याउन सक्ने क्षति कम गर्न विभिन्न उपायमध्ये किरा संकलन गरेर स्थानीय तहका वडा कार्यालयमा बुझाउनेलाई एक किलोग्रामको २० रुपैयाँका दरले नगद प्रोत्साहन दिने व्यवस्था गरेका हौं’ भूमि व्यवस्था,कृषि तथा सहकारी मन्त्रालयका सचिव तेजबहादुर वलीले भने, ‘सलह किरा जम्मा गरेर ल्याउनेलाई वडा कार्यालयहरुले तत्काल नगद दिने छन् ।

सलह किरा दिउँसोमा उड्छ भने साँझमा बास बस्छ । बास बसेका बेलामा समातेर जम्मा गरेर क्षति रोकिनुका साथै मिहेनत वापत प्रोत्साहन रकम लिन मन्त्रालयले अपील गरेको छ । मालाथिन र क्लोरपाइरिफोस विषादी पानीमा मिसाएर छर्केर पनि सलह नष्ट गर्न सकिने मन्त्रालयले सुझाएको छ ।

३ मिलिलिटर मालाथिनमा एक लिटर पानी र २ मिलिलिटर क्लोरपाइरिफोसमा एक लिटर पानी मिसाउन सकिने मन्त्रालयका सचिव सुवेदीले बताए । धानको बीउ त्रिपाल वा प्लास्टिकले ढाक्न अपील मन्त्रालयले धानको बीउलाई सुरक्षित गर्न त्रिपाल वा प्लास्टिकले ढाकेर राख्न अनुरोध गरेको छ ।

‘अहिले जताततै खेत रोपाई गर्ने मौसम छ, सलहले धानको बीउ नष्ट गर्‍यो भने रोपाई नै हुन सक्दैन । सबै किसानलाई धानको बीउ सुरक्षित गर्न त्रिपाल वा प्लास्टिकले राम्ररी ढाकेर राख्न मन्त्रालय अपील गर्दछ’ भूमि व्यवस्थामन्त्री आरती पौडेलले भनिन्, ‘सरकारले एक्लै केही गर्न सक्दैन, यसमा किसान दाजुभाइले सावधानी अपनाउनुपर्ने हुन्छ ।’ सलह किरा हावाको वहाव जता हुन्छ, त्यतै जान्छ । शनिबार रुपन्देहीमा देखिएका सलह पाल्पा र गुल्मीतर्फ लागेका मन्त्रालयले जनाएको छ । सलह किराको ठूलो झुण्डले बास बसेको ठाउँमा एक रातमा ३५ हजार मानिसको खाना बराबर बालीनाली नोक्सान गर्छ ।

पर्सामा देखियो सलहको बथान : धानमा क्षति

बाली सखाप पार्ने सलह नामको फटयांग्रा शनिबार पर्सामा पनि देखा परेको छ। पर्साको पर्सागढी नगरपालिका ३ बढ्निहारस्थित चैते धानबालीमा शनिबार बिहान सलह फट्यांग्राको बथान देखा परेको हो। बिहान खेतमा काम गरिररहेका बेला करिब हजार भन्दा बढीको संख्यामा सलहको बथान आफनो धानबालीमा आएर बसेको किसान अर्जुन नेपालले बताए।

बिहान म खेतमा आली लगाउन आएको थिएँ,अचानक फट्यांग्राको झुण्ड चैते धानबालीमा आएर बस्यो’, नेपालले भने, ‘धानको डाँठ पनि खान थाल्यो, त्यसपछि बुबा, म र दाइ तीन जना मिलेर धानबालीमा बसेपछि फटयांग्राको बथान नजिकको जंगल तिर उडेर गयो।’

बिहान खेतमै रहेका बेला परेकाले सलह फट्यांग्रा धानबालीमा आएर बसेपनि तुरुन्तै धपाउन सफल भएकाले त्यति धेरै क्षति हुन नपाएको उनले बताए। जिल्ला स्वास्थ्य कार्यालय पर्साका प्रमुख डाक्टर रामचन्द्र यादवले पर्साको बढ्निहारस्थित धानबालीमा शनिबार बिहान सलह फट्यांग्राको बथान आएर बसेको र किसान आफैंले धपाएको जानकारी आफूले पाएको बताए।

प्रकाशित भएको : June 27th, 2020

प्रतिकृया दिनुहोस्

सम्वन्धित समाचारहरु