दाङमा लकडाउनको अवधिमा ३६ सय जना विदेशबाट फर्किए, क्वारेन्टाइनमा २७ जना

 

घोराही। दाङमा विदेशबाट फर्किएकाहरुलाई राख्नका लागि विभिन्न स्थानहरुमा क्वारेन्टाइन स्थापना गरिएको भएता पनि फर्कनेको तुलनामा क्वारेन्टाइनमा बस्नको सङ्ख्या ज्यादै न्यून छ । यसरी फर्किएकाहरु मध्ये अधिकांश नागरिक घरपरिवारसँगै बसेका छन् ।

दाङका दश वटा स्थानीय तहमा चैत महिनाको सुरुदेखि हालसम्म तीन हजार ६ सय ३२ जना भारतलगायतका अन्य खाडी मुलुकबाट मानिसहरु भित्रिएको जिल्ला प्रशासन कार्यालय अन्तर्गत रहेको जिल्ला आपत्कालिन कार्य सञ्चालन समितिका सूचना अधिकारी विश्व अर्यालले जानकारी दिएका छन् ।

‘विदेशबाट फर्किएका व्यक्तिहरुलाई सकेसम्म दुई हप्ता क्वारेन्टाइनमा राख्ने योजनाले बेडहरु तयार गरियो’,अध्यक्ष वलीले भने, ‘तर क्वारेन्टाइनमा बस्न कसैले मान्नुभएन । त्यसैले होम क्वारेन्टाइनमा बस्न आग्रह गरेका छौँ ।’

सूचना अधिकारी अर्यालका अनुसार जिल्लामा यो अवधिमा फर्किएका मध्य सबैभन्दा धैरै मानिस बंगलचुली गाउँपालिकाका रहेका छन् । त्यहाँ हालसम्म १४ सय १३ जना विदेशिएकाहरु भित्रिएका छन् । उनीहरु सबै आफ्नै घरपरिवारसँगै बस्दै आएका छन् ।

कोरोनाको जोखिमबाट बच्नका लागि देशबाहिरबाट आएका व्यक्तिहरुलाई कम्तिमा दुई हप्ता अरुदेखि टाढा हुन आग्रह गरेपनि उक्त गाउँपालिकामा घर फर्किएका कोही पनि क्वारेन्टाइनमा बसेका छैनन् ।

त्यसपछि धैरै मानिसहरु भित्रिएको स्थानीय तह घोराही उपमहानगरपालिका हो । घोराहीमा चैत महिना यता १२ सय ८६ जना आएका छन् । उनीहरु मध्य अहिले घोराही उपमहानगरपालिका वडा नं. ३ मा रहेको क्वारेन्टाइनमा ३ जना मात्र रहेका छन् । अन्य सबै घरपरिवारसँगै बस्दै आएका छन् ।

त्यसैगरी स्थानीय तहले बुझाएको तथ्याङ्क अनुसार हालसम्म जिल्लामा तुलसीपुर उपमहानगरपालिकामा दुई सय ८७ जना, गढवा गाउँपालिकामा एक सय ५२ जना, राप्ती गाउँपालिकामा एक सय ३१ जना, राजपुर गाउँपालिकामा एक सय ६ जना, लमही नगरपालिकामा ९० जना, बबई गाउँपालिकामा ८९ जना, शान्तिनगर गाउँपालिकामा ६९ जना र दंगीशरण गाउँपालिकामा २७ भारतलगायतका अन्य देशहरुबाट फर्किएका छन् ।

२७ जना क्वारेन्टाइनमा

विदेशबाट फर्किएकाहरुलाईृ सरकारले अनिवार्य रुपमा १४ दिन क्वारेन्टाइनमा राख्नुपर्ने बताए पनि जिल्लामा अधिकांश मानिसहरु घरपरिवारसँगै बस्ने गरेका छन् । जिल्ला आपतकालिन कार्य सञ्चालन समितिका अनुसार हालसम्म २७ जना व्यक्ति मात्र स्थानीय तहले बनाएका क्वारेन्टाइनमा बसेका छन् । जसमा बबई गाउँपालिकामा १३ जना, तुलसीपुर उपमहानगरपालिकामा ११ जना र घोराही उपमहानगरपालिकामा ३ जना क्वारेन्टाइनमा बसेका छन् । बबई गाउँपालिकामा बसेका १३ जना मध्ये ११ जना घर फर्किएका छन् ।

स्थानीय तहहरुले चैत यता विदेशबाट फर्किएकाहरुको अभिलेख तयार गर्ने काम गरेपनि उनीहरुलाई क्वारेन्टाइनमा राख्न भने सकिएको छैन । विदेशबाट फर्किएका व्यक्तिहरुलाई क्वारेन्टाइनमा बस्न आग्रह गरेपनि उनीहरुले नमान्ने गरेका कारण क्वारेन्टाइनमा बसाउन समस्या रहेको बंगलाचुली गाउँपालिका अध्यक्ष भक्तबहादुर वलीले बताए ।

‘विदेशबाट फर्किएका व्यक्तिहरुलाई सकेसम्म दुई हप्ता क्वारेन्टाइनमा राख्ने योजनाले बेडहरु तयार गरियो’,अध्यक्ष वलीले भने, ‘तर क्वारेन्टाइनमा बस्न कसैले मान्नुभएन । त्यसैले होम क्वारेन्टाइनमा बस्न आग्रह गरेका छौं ।’ उनले अहिले पनि गाउँमा भारतबाट आउने क्रम रहेको जानकारी पनि दिए । जिल्लामा कोरोनाभाइरसको संक्रमण देखिएका विरामीहरुलाई उपचार गर्नका लागि बेलझुण्डीमा कोरोना विशेष अस्पतालसँगै विभिन्न अस्पतालहरुमा १ सय ६६ आइसोलेशन निर्माण गरिएको छ ।

त्यसै गरि विदेशबाट फर्किएकाहरुलाई राख्नका लागि दशवटा स्थानीय तहमा तीन सय ३८ बेडको क्वारेन्टाइन केन्द्र निर्माण गरिएको छ । जस अन्तरगत घोराही उपमहानगरपालिका २५,लमही नगरपालिकामा ३५, राप्ती गाउँपालिकामा २५, गढवा गाउपालिका १०, बङ्गलाचुलीमा २५, तुलसीपुर उपमहानगरपालिकामा ९३, राजपुरमा २५, शान्तिनगरमा १०, बबई गाउपालिकामा ५० र दङगीशरण गाउँपालिकामा ४० गरि ३ सय ३८ बेडको क्वारेन्टाइन अस्पताल निर्माण गरिएको छ ।

दाङमा कोरोना भाइरसको आंशकामा बेलझुण्डी कोरोना विशेष अस्पताल, राप्ती स्वास्थ्य विज्ञान प्रतिष्ठान र राप्ती प्रादेशिक अस्पतालमा गरि १६ जना विरामीको नमूना परिक्षण गरिएको भएपनि सबैमा नेगेटिभ देखिएको छ ।

प्रकाशित भएको : April 6th, 2020

प्रतिकृया दिनुहोस्

सम्वन्धित समाचारहरु